سعودی عرب نے سٹیٹ بینک میں 2 ارب ڈالر جمع کرائے ہیں، وزیر خزانہ اسحاق ڈار
GEO Urdu
وفاقی وزیر خزانہ اسحاق ڈار نے کہا ہے کہ سعودی عرب نے اسٹیٹ بینک میں 2 ارب ڈالر جمع کرائے ہیں۔
اسلام آباد میں پریس کانفرنس کرتے ہوئے وفاقی وزیر خزانہ اسحاق ڈار نے کہا کہ دوست ملک سعودی عرب نے اسٹیٹ بینک میں 2 ارب ڈالر جمع کرائے ہیں۔
اسحاق ڈار نے کہا کہ میں اپنی طرف سے وزیراعظم پاکستان، آرمی چیف اور سعودی حکومت کا شکریہ ادا کرتا ہوں۔
وزیر خزانہ نے کہا کہ مستقبل میں معاشی معاملات میں مزید بہتری آئے گی، پاکستان کی معیشت پہلے سے بہتر ہے، جلد مزید استحکام پیدا ہوگا۔وزارت خزانہ اور آئی ایم ایف کے درمیان بیرونی فنانسنگ کا معاملہ طے پا گیا۔
واضح رہے کہ وزارت خزانہ اور آئی ایم ایف کے درمیان بیرونی فنانسنگ کا معاملہ طے پا گیا ہے.
وزارت خزانہ کے ذرائع کے مطابق آئی ایم ایف نے وزارت خزانہ کی جانب سے بھیجے گئے 8.2 بلین ڈالر کے فنانسنگ گیپ پلان کو قبول کر لیا ہے۔
ذرائع کے مطابق پاکستان کو آئی ایم ایف، ورلڈ بینک، ایشیائی ترقیاتی بینک، چین، سعودی عرب اور یو اے ای سے فنانسنگ حاصل کرنی ہے جبکہ رواں مالی سال کے دوران چین سے 3.5 ارب ڈالر کی فنانسنگ کا بندوبست کیا جائے گا۔
وزارت خزانہ کے پلان کے مطابق سعودی عرب سے 2 ارب ڈالر کی فنانسنگ حاصل کی جانی تھی۔
اس کے علاوہ متحدہ عرب امارات سے ایک ارب ڈالر، ایشیائی ترقیاتی بینک سے 500 ملین ڈالر اور ورلڈ بینک سے 500 ملین ڈالر کی فنانسنگ حاصل کی جائے گی۔
تازہ ترین
ویڈیو
تازہ خبریں
