وفاقی حکومت نے پنجاب میں 14مئی کو الیکشن کے فیصلے پرنظرثانی کی استدعا کردی

وفاقی حکومت کے مطابق پنجاب سب سے زیادہ نشستوں والا صوبہ ہے۔ پنجاب کے نتائج اس بات کا تعین کرتے ہیں کہ ملک کی مرکزی حکومت کی قیادت کون کرے گا۔ پنجاب میں انتخابات قومی اسمبلی کے ساتھ ایک ہی وقت میں ہونے چاہئیں، سپریم کورٹ اپنے ۴ اپریل کے فیصلہ پر نظرثانی کرے، سپریم کورٹ نے پنجاب میں انتخابات کی تاریخ دے کر الیکشن کمیشن کے اختیارات کو استعمال کیا۔

دوسری جانب پنجاب کی عبوری انتظامیہ نے بھی سپریم کورٹ کو ۱۴ مئی کے انتخابات سے متعلق کیس کا جواب فراہم کر دیا ہے۔

پنجاب میں 14مئی کے انتخابات سے متعلق کیس میں چیف سیکرٹری پنجاب کی جانب سے سپریم کورٹ میں جواب جمع کروایا گیا ہے جس میں کہا گیا ہےکہ الیکشن کی تاریخ دینےکا اختیار سپریم کورٹ کا نہیں ہے۔

نگران پنجاب حکومت نے صوبے میں فوری انتخابات کی مخالفت کرتے ہوئےکہا ہےکہ الیکشن کی تاریخ دینےکا اختیار ریاست کے دیگر اداروں کو ہے، 14 مئی الیکشن کی تاریخ دے کر اختیارات کے آئینی تقسیم کی خلاف ورزی ہوئی ہے، آرٹیکل 218 کے تحت صاف شفاف الیکشن کرانا الیکشن کمیشن کا اختیار ہے، اختیارات کی تقسیم کے پیش نظر سپریم کورٹ نے خیبرپختونخوا میں الیکشن کی تاریخ نہیں دی۔