پراپرٹی ٹیکس نادھندگان کے نام اور جائیدادی تفصیلات مشتہر کی جائیں، ایڈیشنل چیف سیکرٹری سندھ

ایڈیشنل چیف سیکرٹری سندھ کا کہنا تھا کہ کابینہ کی باقاعدہ منظوری کے بعد پراپرٹی ٹیکس کلیکشن کا شعبہ محکمہ بلدیات سندھ کو منتقل ہوا ہے جس کے تحت کمرشل و رہائشی جائیدادوں سے ٹیکس وصول کیا جارہا ہے۔ نجم احمد شاہ نے تمام اس موقع پر موجود افسران کو مخاطب کرتے ہوئے کہا کہ جن جائیدادی تفاصیل کا ریکارڈ کمپیوٹرائزڈ سسٹم کے اندر موجود ہے ان کو باقاعدگی کے ساتھ آٹومیٹد چالان جاری کئے جائیں اور محکمہ ڈاک اور کوریئر سروسز کے ذریعے درست پتے پر ٹیکس چالان کا پہنچنا یقینی بنایا جائے۔

انجینئر سید نجم احمد شاہ نے بطور خاص حکم دیا کہ پراپرٹی ٹیکس کی مد میں حاصل ہونے والی رقم کو امانت سمجھ کر ادارے اور عوام کی ترقی پر خرچ کیا جائے اور سندھ سرکار کی رٹ چیلنج کرنے والے عناصر سے کوئی بھی رعایت نہ برتی جائے۔ ایڈیشنل چیف سیکرٹری سندھ نے احکامات جاری کئے کہ پراپرٹی ٹیکس کلیکشن کے مکینزم کو اغلاط سے پاک رکھا جائے اور رشوت ستانی کے حوالے سے کی جانے والی شکایات کا فوری ازالہ یقینی بنایا جائے۔

انجینئر سید نجم احمد شاہ نے مزید کہا کہ پراپرٹی ٹیکس کلیکشن کے کام کو اولین ترجیحات میں شمار کیا جائے اور بڑے نادھندگان کے نام اور جائیدادی تفصیلات اخبارات میں شائع کی جائیں۔