الیکشن سے بگاڑ بڑھے گا، ملک کھائی میں گر رہا ہے، حکومت کو کام کرنے دیا جائے۔ میاں زاہد حسین

ملک مہنگائی، عوام پریشانی میں۔ صنعت و تجارت زوال پذیر ہے۔ الیکشن سے بگاڑ بڑھے گا۔ اعلیٰ عدلیہ میں تقسیم سے اسکی ساکھ متاثر ہو رہی ہے۔ ملک کھائی میں گر رہا ہے۔ حکومت کو کام کرنے دیا جائے۔ میاں زاہد حسین   نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدراورسابق صوبائی وزیرمیاں زاہد حسین نے کہا ہے کہ عوام کی مفلسی و پریشانی اورناکام سیاستدانوں کی خود غرضی آخری حدوں کو چھو رہی ہے۔ اگست تک مینڈیٹ کے باوجود حکومت کو کام نہیں کرنے دیا جارہا جس وجہ سے حکومت معاشی اصلاحات پر مطلوبہ فیصلے کرنے سے قاصر ہے جس کی قیمت عوام اور ملک ادا کر رہے ہیں۔ اعلیٰ عدلیہ میں تقسیم کھل کرسامنے آنے سے انکی ساکھ متاثر ہو رہی ہے۔ عدلیہ کے دونوں دھڑوں کی مخالفت جلد باقائدہ لڑائی کی صورت اختیار کر سکتی ہے جس سے اسکی ساکھ اور وقار کو دھچکہ پہنچے گا۔ مقننہ اورایگزیکٹو منقسم عدلیہ کے فیصلے ماننے کو تیار نہیں ہیں جبکہ جج بھی اپنے موقف میں نرمی نہیں لانا چاہتے۔ ادارے باہم دست و گریبان ہیں اور ملک تیزی سے گہری کھائی میں گررہا ہے صنعت و تجارت ڈوب رہی ہے مگر کسی کو اسکی فکر نہیں ہے۔ میاں زاہد حسین نے کاروباری برادری سے بات چیت کرتے ہوئے کہا کہ اس وقت ملک بھرمیں سستا اورمفت آٹا لینے والوں کی قطاریں لگی ہوئی ہیں لیکن اگر ملک دیوالیہ ہو گیا توتیل اورادویات سمیت ہرچیزکی میلوں لمبی قطاریں لگیں گی، سسٹم ناکام ہو جائے گا، ساراملک تاریکی میں ڈوب جائے گا اورملک کا کوئی بھی حصہ بدامنی اور لوٹ مار سے محفوظ نہیں رہے گا، اس صورتحال میں جان بوجھ کرعدم استحکام پیدا کرکے حکومت کو ناکام بنانے کے بجائے اس کو کام کرنے دیا جائے۔ میاں زاہد حسین نے مزید کہا کہ ناکام سیاستدان پوری طرح طاقت کے کھیل میں مصروف ہیں اورانھیں عوام کے مسائل کی کوئی فکر نہیں ہے۔ عوام اگر باہر نکل آئے تو حالات سنبھالنا مشکل ہوجائے گا۔