جج کو دھمکیاں دینے کے مقدمے میں عمران خان کے ناقابل ضمانت وارنٹ 24 مارچ تک معطل کردیئے گئے ۔

اسلام آباد کی ڈسٹرکٹ اینڈ سیشن عدالت کی جانب سے خاتون جج زیبا چوہدری کو دھمکیاں دینے کی تحقیقات کے سلسلے میں عمران خان کے ناقابل ضمانت وارنٹ گرفتاری 24 مارچ تک معطل کر دیے گئے ہیں۔

عمران خان کے جونیئر وکیل نے استدعا کی کہ سینئر وکیل لاہور سے آرہے ہیں اسلام آباد کی ڈسٹرکٹ اینڈ سیشن عدالت میں دھمکی آمیز خاتون جج زیبا چوہدری کے کیس کی سماعت کے لیے سماعت میں وقفہ لیں۔ جس کے باعث عدالتی عملے نے سماعت کے لیے 11 بجے کا وقت دے دیا۔ 

جب بالآخر سماعت شروع ہوئی تو کسی بھی فریق کا کوئی وکیل موجود نہیں تھا۔ جس کے نتیجے میں ایڈیشنل سیشن جج فیضان حیدرگیلانی کی رخصت کے باعث سماعت شروع کیے بغیر ہی ملتوی کردی گئی اور عمران خان کے ناقابل ضمانت وارنٹ گرفتاری کی معطلی میں 24 مارچ تک توسیع کردی گئی۔

یاد رہے کہ گزشتہ سماعت کے دوران ایڈیشنل سیشن جج فیضان حیدر گیلانی نے عمران خان کو آج 20 مارچ تک مناسب عدالت میں پیش ہونے کا حکم دیتے ہوئے ان کے وارنٹ گرفتاری معطل کردیے تھے۔

واضح رہے کہ 13 مارچ کو سول جج ڈسٹرکٹ سیشن کورٹ رانامجاہد رحیم نے خاتون جج کو دھمکیاں دینے کے معاملے میں عمران خان کی ناقابل ضمانت گرفتاری کا حکم جاری کیا تھا۔

عدم پیشی کے جواب میں عمران خان کو 29 مارچ تک حراست میں لے کر عدالت میں پیش کیا جانا تھا۔

عمران خان کے ناقابل ضمانت وارنٹ گرفتاری کو ایڈیشنل سیشن جج فیضان حیدرگیلانی نے 14 مارچ کو 16 مارچ تک روک دیا تھا۔ جج نے 16 مارچ کو وارنٹ گرفتاری ملتوی کرنے کے بعد 20 مارچ تک متعلقہ عدالت میں پیش ہونے کا حکم دیا تھا۔